( ما انت بعيد )
ما انت بعيد انت العين واقرب من جفنها انته
وما انت غريب انت الوالد اليحضن بيديه وليده وبنته
وما انت وحيد انت الشعب كله بشيعته وسنته
من هو الكَالك ناسيك همَ ينسه الكَمر وكته ؟
لو نبض الكَلب يتنكر الدكَته !
بس عشكَك عشكَ مفضوح وعشكَ الناس كلها مساتر وسكته
صرت انت سبت وبركَبة يهودي هم شايف يهودي يجوز من سبته ؟
انت الفارس اليسبكَ هبوب الريح ما ظن خيل سابكَته
وانت اليرهم ترابك كحل للعين ودوّه للما شفت علته
وانت الريحه ترابك ترد الروح هيل وزعفران وعنبر بشمته
ومثل تراب كّاعك ما لكَينه تراب يرهم للصلاه من طينته تربته
انت ينام بيك المرتضى الكرار ابو الحسنين اتلوذ الناس كلها بشارته وبخته
وانت ينام بيك بكربلاء حسين الما بايع الطاغي ودَنكَ اركَبته
وانت البيك ظلت شارت العباس لمن طاح دنكَله الفرات وباسه من شفته
من اطلعت منك يوم طرني البين كَلبي وياي ما جبته
اثاريني نسيته اهناك عندك كَلبي امنته
شتلته بجرف دجله الخير ويّ سباح الشواطي شربكت بته
وامتدت اعروكَه بوسط ذيج الكَاع ومن ماي الفرات ودجله عمدّته
ولمّن صار ينكَل جدمه بين الناس اخذته وياي للكاظم على الشباك زورته
صح هسه اصبحت من وطن نيدر لاند هولندي الهويه وشعري جللته
وصح اتأقلمت ويه الغرب فذ نوب وصرت ماسخ مثلهم والملح عفته
وصح كَمت ارطن رطنهم لمّن يرطنون ولسان العرب بالأعجمي اكسرته
لكن ما ادري شنهي يصير بيه من يمر طاريك احسك دفؤ تموز وسط اشته
واثاريني مثل طبع النخل لو طال يرجع للاصول وتنحني اشعفته
وطنه ما نعوفه للاجا والراح عراق الينتميله يا كبر بخته
من غصبن علينه يا وطن عفناك وانت مضيفنه الما تنجفي دلته
من يوم الرحلنه وجاد بينه السير ظلت روسنا اعلى الدار ملتفته
العالم نسه يوم اهدعش من ايلول صارت بيك سالفته
ناس تكَول لازم نحتويه ونشفط البترول ونعوض الراح ونسركَ ابركَته
وناس تكَول لازم هالحصار يدوم وناس تكَول لازم ننزع اسلحته
وناس تكَول خطيه اطفاله ماتوَ من الجوع وناس تكَول ما حمد ربه وشاكر نعمته
وانت بين هذا وذاك صاير شبح لليرمون وياهو الكَام ضدك سدّد اتفكته
جي لنك حلو والدول منه اتغار ما عدهم العندك من مجد نلته
انت اول وطن آدم وضع جدمه عليه وكَال يا الله ولنك وصله من جنته
وانت اول وطن حبه النبي ابراهيم ودعا ربه يصونه برحمته وعزته
وانت اول وطن مرسى السفينة نوح ونبي ايوب ناخت بيك راحلته
وانت اول وطن علم العالم ابجديه ويكتب التاريخ
وانت اول وطن قانون سننته
وانت اول وطن كَالتله الشمس يمّه صباح الخير ولو رادت تمسي تمسي يمّ كَبته
وانت اول وطن ما تشبه الاوطان مدري شلون ربك خالقك سبحان ربي شلون صوّرته
صوّرت العراق وبس علينه يلوكَ واحنه انلوكَله لمن يحل وكته
عراق المال والابطال كل الناس واصفته
ذول اهل الغدر من عندك شيريدون يا هو الطاح منهم ما اجه وعنته
كان جيبك مو الك لما العرب ينخوك عزيز المال هيج وهيج طشرته
شو لمن طحت ما واحد اجاك وكَال عند عيناك وانت جروحك ينزفن مثل دمع الشمع سكته
وبقيت وحيد مدمى بساحة الميدان واطفالك عليك بصفك ينوحون وانت تون ولا مثله كَبل مذبوح ونّ ونته
توجيت اعلى جرحك كَمت ما اهتميت خاف الشامت يشوفك طريح ويشتفي بشمته
طبع بيك المكابر اكبر من الاه واكبر من غدرهم يا بخت لفته
جم غازي بغازي المر عليك وزال وتكنسه السنين امكَبع بذلته
صفوا بالمزبله ويلعنهم التاريخ كل ذوله الغزاة اشخاص راحوا والبقيت انته
تراب بلادنا يرفض اجدام الأجنبي والغازي والمحتل.. تراب بلادنا بس انبياء الله ساحكته